საქართველო, 9 დეკემბერი, საქინფორმი. საპარლამენტო დემოკრატიული ფორუმის თავმჯდომარემ, ლიტველმა დეპუტატმა ემანუელის ზინგერისმა უკრაინის ოპოზიციური პარტია “უდარის” ლიდერ ვიტალი კლიჩკოს ევროკავშირის საბჭოში ლიტვის თავმჯდომარეობის ფერის ჰალსტუხი გადასცა, როგორც ევროკავშირში უკრაინის მომავალი წევრობის სიმბოლო.

“ყველამ იცის, რომ ეს ჰალსტუხი ლიტვის თავმჯდომარეობის სიმბოლოა (ევროკავშირის საბჭოში - საქინფორმი), ეს ჩვენი თავმჯდომარეობის ფერია (ცისფერი - საქინფორმი). და ნება მომეცით, ეს ჰალსტუხი უკრაინის სამოქალაქო საზოგადოების ლიდერს გადავცე, რომელიც დიდხანს ვარჯიშობდა ლიტვაში, ყოველი ლიტველისათვის ძვირფას ვიტალი კლიჩკოს. ეს ჰალსტუხი ძირითადი სიმბოლოა იმისა, რომ უკრაინა აბსოლუტურად თავისუფალი უნდა იყოს, და უკრაინის თავისუფლება გარანტირებული უნდა იყოს ევროპის კავშირში უკრაინის წევრობით!”, - აღნიშნა ზინგერისმა.

მან იმედი გამოთქვა, რომ კლიჩკო დიდხანს შეინახავს ამ სუვენირს, როგორც 28 ნოემბრის გახსენებას, როდესაც “ლიტვამ აირჩია არა ეკონომიკა, არა ენერგეტიკა, არა ტრანსპორტი, არამედ ევროკავშირის “აღმოსავლეთ პარტნიორობის” აშენება”.